Ադրբեջանի արտգործնախարար Էլմար Մամեդյարովը օրերս տված հարցազրույցում մի շարք պնդումներ է արել, որոնք մեծ արձագանք են գտել հայաստանյան մամուլում, սակայն չեն համապատասխանում իրականությանը։ Մամեդյարովը մասնավորապես ասել է՝ հայկական կողմը բանակցություններին ներկայացրել է «Լավրովի պլանը», և իբր բանակցությունների օրակարգում ղարաբաղյան խնդրի կարգավորման փուլային տարբերակն է, ըստ որի՝ նախ Ադրբեջանին պետք է հանձնվեն Ղարաբաղի վերահսկողության տակ գտնվող շրջանները, ապա նոր միայն կհստակեցվի ԼՂ-ի կարգավիճակը:
Հայաստանի արտաքին գործերի նախարարության մամուլի խոսնակ Աննա Նաղդալյանը նշել է, որ այս պահին բանակցությունների սեղանին որևէ փաստաթուղթ դրված չէ և չի քննարկվում։
Անդրադառնալով Մամեդյարովի այն պնդմանը, թե Հայաստանը հստակ չի կարողանում սահմանել անվտանգության վերաբերյալ իր մոտեցումը, խոսնակը նշեց, որ Հայաստանի դիրքորոշումը Արցախի անվտանգության վերաբերյալ հայտնի է և այն չի փոփոխվել։ Վերջին անգամ Զոհրաբ Մնացականյանը այդ մասին ծավալուն կերպով խոսել է Բրատիսլավայում՝ Ադրբեջանի իր գործընկերոջ հետ հանդիպումից հետո։
«Ադրբեջանն իր վարած քաղաքականությամբ բազմիցս ապացուցել է, որ վերջինս որևէ դեպքում չի կարող լինել Արցախի համար անվտանգության երաշխավոր։ Արցախի անվտանգության երաշխավորողը Հայաստանն է և չի կարող լինել այնպիսի տարբերակ, որ Արցախը մնա առանց անվտանգության ապահովման», - նշել է Նաղդալյանը։
Ղարաբաղյան հիմնախնդրի կարգավորման հիմքը Արցախի ժողովրդի ինքնորոշման իրավունքի ճանաչումն է, որը պետք է իրացվի առանց սահմանափակման և հարկադրման։ Այլ բոլոր առաջարկվող տարբերակները, որոնք չեն ապահովում այս պայմանը, չեն կարող ընդունելի լինել Հայաստանի համար։
Մեկնաբանություններ
Մեկնաբանություն թողնելու համար պետք է մուտք գործել կամ գրանցվել:
Մուտք Գրանցվել